САД испраќаат уште 100 милиони долари за жртвите во Турција и Сирија

САД ќе доделат уште 100 милиони долари помош за настраданите од разорниот земјотрес, покрај претходно одобрените 85 милиони долари, соопшти денеска Стејт департментот. Претседателот Џо Бајден планира да одобри 50 милиони долари за помош на бегалците и мигрантите и уште 50 милиони долари за луѓето кои загинаа во разорниот земјотрес.

Оваа вест ја соопшти и американскиот државен секретар Антони Блинкен, кој во неделата пристигна во воздухопловната база Инџирлик каде се стационирани околу 1.500 американски војници. Токму од Инџирлик дел од хуманитарната помош, особено американската, беше испратена во подрачјата погодени од земјотресот со јачина од 7,8 степени според Рихтеровата скала што ги погоди Турција и Сирија на 6 февруари. Од базата Инџирлик Блинкен со хеликоптер полета до провинцијата Хатај на југоисток, која исто така беше тешко оштетена од земјотресот.

Тој земјотрес, најголемата катастрофа што ја доживеа модерна Турција, однесе 41.000 човечки животи во Турција и околу 6.000 во Сирија. Повеќе од милион луѓе останаа без покрив над главата, а вкупната материјална штета се проценува на неколку милијарди долари.

„Кога ќе го видиме обемот на штетата, бројот на згради, станови, куќи кои се уништени, (знаеме дека) ќе бидат потребни огромни напори за обнова на областа и ние сме посветени да помогнеме“, рече Блинкен. „Додаваме уште 100 милиони долари помош за луѓето на кои очајно им е потребна.

Блинкен денеска треба да се сретне со воените и хуманитарните лидери кои ја координираат американската помош. На вториот ден по земјотресот, САД испратија неколку тимови за пребарување и спасување во Турција, околу 200 луѓе, и ги одобрија првите 85 милиони долари хуманитарна помош. Тој обезбеди и хеликоптери Black Hawk и Chinook за транспорт на опрема.

Обединетите нации ја повикаа меѓународната заедница да собере една милијарда долари помош за жртвите во Турција. Блинкен во недела навечер треба да пристигне во Анкара, каде во понеделник ќе разговара со турскиот претседател Реџеп Таип Ердоган. Покрај природната катастрофа, централна тема на разговор ќе биде и ќор-сокакот во обидите на Шведска и Финска за членство во НАТО, што Турција досега одбиваше да го ратификува.