САД ги прогласија јеменските Хути за „терористичка“ група
Советникот за национална безбедност на Белата куќа, Џејк Саливан, објави дека САД ги означиле јеменските Хути како терористичка група како одговор на нивните напади врз бродови во Црвеното Море, пренесува Ал Џезира.
„Денеска, како одговор на овие континуирани закани и напади, Соединетите држави објавија дека Ансар Алах, исто така познати како Хути, како специјално назначена глобална терористичка група“, рече Саливан во соопштението.
Сепак, тој додаде дека одредбата, која стапува на сила за 30 дена, може да биде ревидирана доколку Хутите престанат со нападите во Црвеното Море и во Аденскиот Залив.
Администрацијата на Џо Бајден изјави дека повторното назначување на Хутите, кое доаѓа со остри санкции, нема да има негативно влијание врз јеменскиот народ бидејќи санкциите ќе вклучуваат хуманитарни отстапки.
„Испраќаме јасна порака: комерцијалните пратки до јеменските пристаништа на кои се потпира јеменскиот народ за храна, лекови и гориво треба да продолжат и не се опфатени со нашите санкции“, се вели во соопштението на Белата куќа во средата.
Според Ал Џезира, пораката е обид да се намали загриженоста дека повторното воведување на санкциите против Хутите може да има негативно влијание врз јеменскиот народ, кој со години страда од почетокот на војната во земјата во 2014 година, што доведе до една од најлошите хуманитарни кризи.
