САД: Доаѓа најголемиот кран за да започне отстранувањето на остатоците од урнатиот мост во Балтимор
Најголемиот кран на светот се преместува од источниот брег на САД во Балтимор за да започне денеска со отстранување на мостот кој се урна кога брод удри во него и го блокираше виталното пристаниште на градот.
Дел од мостот Френсис Скот Ки во Балтимор се урна откако контејнерски брод удри во него рано наутро во вторникот, испраќајќи повеќе возила во водата. Од ледената вода се извлечени телата на двајца работници, а потрагата по уште четворица исчезнати во несреќата е прекината.
Гувернерот на американската сојузна држава Мериленд, каде се наоѓа Балтимор, Вес Мур, изјави дека пристигнуваниот кран може да подигне до 1.000 тони и дека ќе се користи барем уште еден кран за отстранување на урнатиот мост.
Плановите за отстранување на мостот ги развиваат инженерскиот корпус на армијата на САД и морнарицата, кои мобилизираат ресурси од целата земја за да го исчистат водениот пат во рекордно време.
Мур рече дека не се работи само за државата Мериленд, туку и за економијата на земјата, бидејќи низ пристаништето Балтимор минуваат повеќе автомобили и земјоделска опрема од кое било друго пристаниште во Америка.
Гувернерот предупреди дека работата може да потрае долго и се заблагодари на администрацијата на американскиот претседател Џо Бајден што одобрила итна помош од 60 милиони долари. Бајден рече дека федералната влада ќе ги плати сите трошоци за обнова на мостот.
Штетата предизвикана кога контејнерски брод изгуби струја и удри во столб за потпора на мостот во вторникот вечерта е голема. Нуркачите ги извлекоа телата на двајца мажи од возило во реката Патапско во близина на средината на мостот во средата, но властите рекоа дека морале да започнат со расчистување на мостот пред некој да стигне до телата на уште четворица исчезнати работници.
Полицијата соопшти дека врз основа на снимки од сонар, нивните возила изгледале како затрупани со огромна количина бетон и метал.
Федералните и државните власти велат дека судирот на бродот со мостот што го предизвикал неговото уривање изгледал како несреќа.
Загинатите, кои биле дел од група работници кои ги поправале дупките на мостот во моментот на несреќата, биле од Мексико, Гватемала, Хондурас и Ел Салвадор, соопштија властите. Најмалку осум лица паднале во водата кога бродот удрил во столб на мостот, а двајца биле спасени истиот ден.
