РУСИТЕ ЈА ОСВОИЈА ЦРНА ГОРА: Купуваат имоти, вложуваат големи пари

Најголеми странски инвеститори во Црна Гора за периодот јануари-мај годинава се руските државјани, кои во тој период инвестирале 52,5 милиони евра.

Ова го покажуваат податоците на Централната банка (ЦБЦГ), пренесува порталот Бизнис.

Најмногу пари вложиле во купување недвижен имот – 28,9 милиони евра, 12,3 милиони евра во фирми и банки во Црна Гора и 13,2 милиони евра меѓукомпаниски долгови, односно заеми на нивните фирми во Црна Гора, пишува Мина повикувајќи се на Вијести.

Со ова се потврдува дека без оглед на нарушените дипломатски односи меѓу Црна Гора и Русија, поради украинската криза и воведувањето санкции против Русија, руските граѓани сепак во голем број доаѓаат во Црна Гора и го носат својот капитал за инвестирање. Дека е така покажува и податокот дека Црна Гора за периодот јануари-јуни годинава на странци издала 21,5 илјади работни дозволи, од кои 7,41 илјади или 34,3 отсто од вкупниот број се однесуваат на државјани на Русија.

Инвеститорите од Русија имаат многу мал одлив на инвестиции од Црна Гора, за разлика од другите. Од вложените 52,5 милиони евра, руските граѓани за овие пет месеци повлекле 11 милиони евра од Црна Гора, најмногу преку продажба на недвижен имот за шест милиони.

Втори највредни инвеститори се граѓаните и компаниите од Србија, кои инвестирале 48 милиони евра, од кои 26,1 милиони евра најмногу биле за купување на недвижен имот, 10,5 милиони евра кредити на нивните компании во Црна Гора и 8,2 милиони евра инвестиции во компании и банки регистрирани во Црна Гора. Во истиот период инвеститори од соседните земји од Црна Гора повлекле 25,3 милиони евра, најмногу преку продажба на недвижен имот, 12,4 милиони евра.

На трето место се инвеститорите од Швајцарија, кои за овие пет месеци во Црна Гора инвестирале 39 милиони евра. Најмногу инвестирале преку кредити на нивните компании во износ од 27,2 милиони евра, директните инвестиции во фирми и банки биле 6,6 милиони, а во купување недвижен имот 5,1 милиони евра. Инвеститорите од оваа земја во истиот период од Црна Гора повлекле 17,7 милиони евра, од кои најмногу, 10,5 милиони, се преку продажба – намалување на акциите во фирми и банки регистрирани во Црна Гора.

На четврто место по вредност на директните странски инвестиции се граѓаните и компаниите од Турција со инвестиција од 32,1 милиони евра. Најмногу потрошиле за купување недвижен имот, 21,6 милиони евра, а потоа за заеми на нивните фирми во Црна Гора, девет милиони евра, додека во фирми и банки вложиле 815.000 евра. Инвеститорите од Турција имале најголем одлив на инвестиции од Црна Гора во износ од 31,8 милиони евра, па нивното влијание во нето-приливот на странски инвестиции е само 300.000. Турските граѓани и компании изнеле најмногу пари од Црна Гора преку продажба на акции во компании од 18 милиони евра, како и преку отплата на кредити од 12 милиони евра.

Земја која е членка на Европската унија (ЕУ), Германија со 28,3 милиони евра е само на петтото место по странски инвестиции. Во купување на недвижен имот најмногу пари вложиле граѓаните и фирмите од оваа земја – 18,5 милиони евра, 5,6 милиони во домашни фирми и банки, а четири милиони кредити на нивните фирми кои работат во Црна Гора. Инвеститорите од оваа земја имале и одлив на инвестиции вредни 9,7 милиони евра, од кои 7,6 милиони се однесуваат на повлекување пари од домашни компании и банки.