Рушење или санација па пуштање во употреба на мостот „Беласица“ – кои се можните решенија?
„Во овој момент се работи вештачењето на состојбата со мостот „Беласица“ со цел утврдување дали воопшто има структурно оштетување. Во моментот мостот е затворен како превентива, се додека не добиеме уверување од релевантните институции дека е безбеден или дека треба да се интервенира. Несериозно е од декани, неименувани експерти како и неименувани „извори“ да се предизвикува паника кај граѓаните, велат од Град Скопје преку соопштение.
Мостот „Беласица“ предизвика сериозна загриженост. Градот Скопје побара да се остави стручните лица да направат проценка на штетите на мостот и сметам дека тоа треба да се испочитува, вели Стојанче Ангелов, директор на ЦУК и лидер на Достоинство во СТУДИО 10 на ТВ 24.
– Треба прво да се утврди штетата, потоа дали може да се санира мостот и за колку време. Јас се надевам дека тоа ќе се случи најбрзо што може и дека нема да дојде до уривање како што се шират шпекулации. Затворањето на мостот е неопходна превентивна мерка додека се врши проценката. Не смееме да си дозволиме да ризикуваме некој да настрада, вели Ангелов.
Ангелов вели дека според увидот на лице место, под мостот се забележани остатоци од душеци и ќебиња што значи дека таму престојувале луѓе. Оттука, вели Ангелов, може да е причина човечки фактор, а може и да е запалена инсталација од Топланата во Аеродром, но пред да се утврди не смее да се шпекулира.
– Постоеше стравување да не има гасоводни цевки под мостот, но откако се утврди дека нема дури тогаш почна противпожарната служба да го гасне пожарот. Во меѓувреме постигната е висока температура што може да се одразило на арматурата на мостот, вели Ангелов.
Мостот „Беласица“ во овој момент се вештачи, а во наредните неколку денови ќе се донесе и одлука за тоа дали ќе се врати во употреба веднаш, или пак ќе има било каква интервенција пред да се стави во употреба, појаснија од Град Скопје.
– Со ова, сакаме да ги демантираме и дезинформациите и паушалните раскази на медиуми кои ја користат оваа ситуација за водење на политичка агенда која на ниту еден начин не помага на разрешување на ситуацијата, се наведува во нивната реакција.
