Рот: Пратениците побрзо да гласаат за уставни промени, луѓето се нетрпеливи
Германскиот пратеник Михаел Рот на заедничка прес-конференција со министерот за надворешни работи Бујар Османи денеска ги повика пратениците во македонското Собрание да гласаат за уставните измени набрзо за земјата да го продолжи својот пат кон Европската унија. Рот кажа дека тоа не е само наш интерес, туку интерес и на ЕУ.
-Сега имаме предлог што е на маса и што мора да се примени, не за овде да се подобри ситуацијата на малцинствата, туку да се постигне пробив за Северна Македонија на патот во правец на Европската унија. И мораме темпото да го забрзаме. Луѓето во оваа земја се нетрпеливи, но тоа не е само во ваш интерес, тоа е и во наш интерес. Не можеме да си дозволиме и во друг регион да има нестабилност. Сега е потребна јасна определба за држење заедно и за европеизација во Западен Балкан. Затоа мојата порака е многу јасна, рече германскиот пратеник.
Според Рот, едно прашање е важно, а тоа е како можеме да придонесеме за блокадите да се надминат и конечно да зборуваме за она што им е најважно на луѓето во земјата: демократијата, борбата против корупцијата, владеење на правото, благосостојба, слобода, помирување…
-И затоа ве молам мои колеги и колешки тука во Собранието дадете го својот придонес за неопходната уставна примена не кога било, туку во брзо и по можност да добие двотретинско мнозинство и потоа повторно може да се карате за ова или за она и да разговарате, истакна Рот.
Се надевам, кажа тој, дека нашите сигнали за солидарност и за држење заедно навистина ќе бидат разбрани од сите за да може навистина во центарот на нашата работа да дојдат работите кои се важни, а тоа се уставните промени.
-Никој во Брисел, никој во Софија, никој во Берлин, никој во Париз нема право да одлучува за вашиот идентитет, култура и традиција. Тоа го одлучуваат луѓето во вашата земја сосема сами. Северна Македонија е пример за мултиетницизам, каде вашиот министер прво зборува на македонски, па на албански јазик. Тоа за вас е нешто што се подразбира, рече Рот.
За планот со шест точки што го презентираше во Собранието, рече дека не знае дали тој ќе биде прифатлив за другите земји, но рече дека неговата Влада е за повеќе можности и да се тргнеме од политиката на едногласност.
Рот зборуваше и за Украина посочувајќи дека во време на војна држењето заедно е најважното.
Министерот за надворешни работи Бујар Османи потенцира дека не треба да заборавиме дека уставните измени ќе доведат до отворање на третото и четвртото поглавје.
-Северна Македонија после 17 години ги отвори преговорите минатата година, скринингот се одвива според планираното, денеска беше усвоен на еден од формалните тела на Европската унија и извештајот за првиот кластер, со што земјата навистина се движи напред во европскиот процес, основниот принцип на преговарачката рамка кој што го усвои Европската унија минатата година е „не“ за историските и идентитетските праша во специјалниот дел во преговарачката рамка каде што има и писмени извештаи и гласање на земјите членки, но „да“ за човековите за малцинските права и оттука ни е важно прашањето на уставните измени, бидејќи е во рамки на нашата позиција дека да разговараме за човрекови права за малцински права, но не разговараме за историски и иднетитетски прашања и оттука е многу важна поддршката што ја добиваме за процесот на уставни измени кој што не само ќе гарантира продолжување и отворање на поглавјето кое што ни е потребено, туку на некој начин ја фаворизира нашата позиција по однос на овој спор, изјави министерот.
Османи посочи дека усвоената Резолуција во Бундестагот минатата година е потврда за недвосмислената, активна поддршка на Северна Македонија за влез во ЕУ со својот идентитет, јазик, култура и историја, како дел од севкупниот мозаик на европската култура. Тој резолуцијата ја оцени како акт на непоколеблива поддршка за пристапниот процес на земјата.
– Оваа подршка се разбира не е нова, туку претставува континуитет на едно долгогодишно пријателство помеѓу двете земји, посочи Османи.
Германскиот пратеник денеска учествуваше на конференција во Собранието и имаше средби со пратеници.
