Рокот за исплата на „Мој ДДВ“ пробиен – 370 милиони денари сè уште не се исплатени

За првпат откако функционира системот „Мој ДДВ“, не е испочитуван рокот за исплата на парите од страна на државата, па дел од граѓаните кои летово скенирале фискални сметки сè уште не ги добија своите средства.

Се работи за исплатата за последниот пресметковен период – јули, август и септември. Во минатото, парите се исплаќаа најдоцна до 10-ти во месецот. Со доаѓањето на актуелната влада, рокот за исплата беше продолжен до крајот на месецот. Сепак, заклучно со денеска, последниот ден од работната недела, тој рок не е испочитуван.

Управата за јавни приходи (УЈП) соопшти дека до вчера се исплатени 552 милиони денари кон граѓаните преку „Мој ДДВ“, а налозите за дополнителни 370 милиони денари се веќе подготвени за исплата.

Директорката на УЈП, Елена Петрова, објасни дека кај дел од граѓаните може да има застој поради технички причини, како што се невалидни трансакциски сметки. Меѓутоа, проблемот со неплатени средства се однесува и на граѓани кои немаат проблеми со трансакциските сметки и редовно ја ажурираат апликацијата „Мој ДДВ“.