Рокот истече, оглас нема: Собранието сè уште без постапка за нов член на Комисијата за спречување и заштита од дискриминација
Во период кога стивнуваат реакциите по последниот избор на членови на Комисијата за спречување и заштита од дискриминација, Мрежата за заштита од дискриминација го повика Собранието да ја испочитува законската обврска и да распише нов јавен оглас за избор на член на Комисијата.
Оттаму посочуваат дека по откажувањето на една предлог-кандидатка и изборот на двајца членови, потребно е повторување на постапката во целост. Според Законот за спречување и заштита од дискриминација, доколку Собранието не избере членови на Комисијата, мора да се објави нов јавен оглас веднаш, а најдоцна во рок од десет дена.
Со оглед дека двајца членови беа избрани на 29 јануари 2026 година, рокот за распишување нов оглас истекол на 8 февруари 2026 година. До денес, како што наведуваат од Мрежата, таков оглас не е објавен.
„Крајно време е Собранието сериозно да го сфати значењето на Комисијата како чувар на достоинството на граѓаните, што претставува основа за создавање здраво демократско општество“, се вели во реакцијата.
Од Мрежата ги потсетуваат пратениците на нивната законска одговорност, која подразбира утврдување листа на кандидати што ги исполнуваат условите предвидени со закон, присуство и активно учество на седницата за нивно претставување, како и навремено известување на граѓанските организации за датумот и часот на седницата и доставување на потребната документација.
Дополнително, се бара обезбедување транспарентен процес за следење на седницата на Комисијата за избори и именувања, на која ќе се одлучува за предлог-член на Комисијата.
Законот предвидува кандидатите да бидат државјани на Република Северна Македонија, да имаат најмалку 240 ЕКТС кредити или VII/1 степен на образование и минимум седум години работно искуство во областа на човековите права, од кои пет години во областа на еднаквост и недискриминација. Исто така, не смеат да имаат изречена правосилна казна затвор над шест месеци или забрана за вршење професија, ниту да бидат носители на функција во политичка партија.
Мрежата за заштита од дискриминација најавува дека ќе продолжи внимателно да го следи процесот и изразува очекување за објективен избор на стручно и политички независно лице.
