Ристовски: Министерството за спорт не е организатор на ЕМОФ 2025, но дадовме целосна поддршка
Министерот за спорт, Борко Ристовски, изјави дека Министерството за спорт и Владата на Република Северна Македонија дале целосна логистичка и финансиска поддршка за одржувањето на Европскиот младински олимписки фестивал (ЕМОФ) 2025, но не се организатори на настанот.
„Вложивме над еден милион евра за поддршка на фестивалот, но тоа беше исклучиво врз основа на барањата кои ни беа доставени од организаторите – Македонскиот олимписки комитет и Град Скопје. Немаме апсолутно никаква инволвираност во организацијата, ниту може да имаме затоа што не сме организатори“, рече Ристовски во интервју за Дневникот на МТВ.
Тој објасни дека државата, покрај финансиската поддршка, ставила на располагање и сместувачки капацитети во студентските домови, како и други ресурси.
„Обезбедивме 50 автобуси, 150 нови кревети, кетеринг за дел од делегациите и ги отстапивме без надомест државните објекти. Сè што беше побарано – го исполнивме. Но, организацијата како таква не беше наша обврска“, нагласи министерот.
Во јавноста изминативе денови се појавија бројни критики за организациските пропусти на фестивалот, но Ристовски посочи дека тие најчесто се упатуваат на погрешна адреса.
„Организацијата е доделена пред две години, без обврска од тогашната или сегашната Влада да го финансира или преземе во целост настанот. Ние како институција се најдовме во веќе поставена ситуација и помогнавме со сè што беше во наша надлежност“, истакна тој.
Министерот додаде дека ваков тип на спортски настани бараат долгогодишна и прецизна подготовка, а не импровизации во последен момент.
„Во последните два месеци правиме сѐ што можеме да ги закрпиме дупките што ги оставија организаторите. Јас лично укажав дека сите делегации треба да бидат сместени во хотели, а не во студентски домови, но немавме влијание врз тие одлуки“, рече Ристовски.
Сепак, министерот подвлече дека ваков меѓународен настан е шанса за промоција на македонскиот спорт и младите спортисти.
„Ова е огромна можност – со учество на рекордни 181 македонски спортист во сите 15 дисциплини. Тоа мора да остане како главна придобивка од фестивалот, без оглед на пропустите“, изјави Ристовски.
Европскиот младински олимписки фестивал ЕМОФ 2025 се одржува од 20 до 26 јули во Скопје и Куманово, со учество на повеќе од 4000 спортисти од 49 земји.
