Ристоска со одговор на нападите: Не изигрувам жртва!
Обвинителката Ленче Ристоска ги отфрли како невистинити тврдењата изнесени од адвокатката Лејла Кадриу, оценувајќи дека станува збор за лаги кои, како што вели, лесно можат да се проверат.
Ристоска истакна дека постојат докази за трошењето на средствата во 2015 година, како и записници за кои, според неа, адвокатката зборувала без да била присутна во поранешното Специјално јавно обвинителство во тој период. Таа нагласи дека станува збор за поранешен обвинител кој бил разрешен од Совет на јавните обвинители поради тешка дисциплинска повреда и непрофесионално постапување во предмет што, како што посочи, нема поврзаност со СЈО.
Во изјавата Ристоска посочи и дека изнесените ставови на Кадриу масовно се споделуваат од лица кои се обвинети, осомничени, амнестирани или суспендирани, при што, како што рече, освен поранешниот премиер Никола Груевски, тие не биле поврзани со предмети на СЈО.
Таа смета дека нападите се случуваат во период кога е кандидат за републички јавен обвинител и дека тоа, според неа, „дава тежина на кандидатурата“ и покажува дека е вистински избор за функцијата.
Ристоска додаде дека не се претставува како жртва, туку како борец против криминал и корупција, оценувајќи дека одредени профили на лица се чувствуваат засегнати од нејзината определба во таа борба.
