Ристески: Договорот за зголемување на платите во јавната управа е доказ дека социјалниот дијалог функционира
Постигнатиот договор за зголемување на платите во државната администрација е доказ дека социјалниот дијалог функционира и дека институциите работат транспарентно, оцени заменик-министерот за економија и труд Марјан Ристески во емисијата „Тема на денот“ на Сител телевизија.
Тој посочи дека со договорот со двата репрезентативни синдикати – САДУ и УПОЗ – предвидено е зголемување на платите за над 40 проценти за околу 11.000 вработени во администрацијата, кое ќе се реализира заклучно со 2028 година. Според него, со ова се заокружува процесот на усогласување на платите во секторите каде што Владата е директен работодавач, потсетувајќи дека во изминатиот период беа постигнати договори и за зголемување на платите во образованието, здравството, социјалната заштита, армијата и полицијата.
Ристески нагласи дека новиот договор ќе овозможи овие вработени да се доближат до нивото на примања во други институции, при што, како што рече, се коригираат неправдите создадени во минатото. Тој укажа дека бил наследен неусогласен систем, во кој платите во јавниот сектор се регулирале преку различни колективни договори и правилници, што довело до нееднаквости – вработени на исти позиции да примаат различни износи.
Во наредниот период, најави тој, ќе следат преговори со репрезентативните синдикати за нов Општ колективен договор за јавниот сектор, со оглед дека постојниот е истечен. Целта, според него, е воспоставување јасен и системски модел за пресметка и раст на платите, што ќе овозможи поодговорно буџетско планирање.
Во однос на минималната плата, Ристески повтори дека клучно е договорот да се постигне меѓу синдикатите и претставниците на приватниот сектор. Владата, рече тој, ќе го прифати секое решение што ќе произлезе од нивниот договор, а доколку не се постигне согласност, минималната плата ќе се усогласи согласно важечкото законско решение.
