СИТЕ АНАЛИЗИ ОД ОБДУКЦИИТЕ ЌЕ БИДАТ ПРЕЗЕНТИРАНИ Родителите на жртви од Кочани се сретнаа со директорот на Судска медицина
Дел од родителите на децата што загинаа во пожарот во дискотеката „Пулс“ во Кочани денеска имаа средба со директорот на Институтот за судска медицина во Скопје Александар Станков, од кого пред неколку дена побараа одговори за токсиколошките анализи од обдукцијата на телата на жртвите.
Директорот на Институтот за судска медицина во Скопје, Александар Станков, во изјава за медиумите по средбата, рече дека разговарале и им било објаснето сè што треба и дека сите докази ќе бидат јавно презентирани во судница.
– Разговаравме и објаснето им е сè што треба досега да се објасни. Како што и претходно дадов изјави, сè што е побарано од нас е завршено и сите докази ќе бидат јавно презентирани во текот на судската постапка – изјави Станков.
Александар Наунов, татко на Надица Наунова која загина во пожарот, а кој е претседател на Здружението на граѓани „16 март 2025 Кочани“, по средбата со директорот на Судска медицина Александар Станков, изјави дека ги примил и разговарале, но дека не може да дава никакви податоци за извршените анализи, уверувајќи дека материјалите се предаени на Обвинителството.
– Денеска не прими директорот Александар Станков, со него разговаравме. Тој не може да каже од што и како е, тоа мора да биде изведено на суд – изјави Наунов.
На средбата, како што појасни Наунов, добиле само потврда дека се направени токсиколошки анализи.
– Ние имавме и претходно средба со него, затоа што тој сам ни кажа дека тоа ќе влијае на судењето и било што да се изведе, ние да го дознаеме, пред да го даде на судот. Затоа го почитуваме и имаме доверба во Институтот и ќе чекаме со нетрпение да дојде рочиштето, да ја слушнеме правата вистина за нашите деца од што починале – изјави Наунов.
Во судницата во Идризово денеска продолжи судењето за пожарот во дискотеката „Пулс“, кој избувна на 16 март 2025 година и во кој загинаа 63 лица, а над 200 беа повредени.
Судењето се наоѓа во фаза на доказна постапка и се испитуваа сведоци предложени од обвинителството. Процесот го води судијката Дијана Груевска-Илиевски, а обвинението го застапува тим од 15 јавни обвинители.
.
