Револт кај семејствата на жртвите од Модуларната болница: Меморијалниот парк е наша иницијатива, политичарите да не прават предизборна церемонија
Изградбата на спомен парк за 14-те жртви од модуларната болница во Тетово ги револтираше семејствата на жртвите. Мумин Исмаили вели дека иницијативата била нивна, а нивното барање до Министерството за здравство било меморијалниот парк да се изгради на местото каде што беше модуларната болница, а не на друга локација. Според него, вчерашните изјави биле за политички поени и тој апелира до функционерите овој случај да не се злоупотребува.
„Иницијативата за меморијалниот парк беше наша, на семејствата на жртвите. Преку медиумите го слушнав и Биљал Касами и министерот за здравство Алиу дека иницијативата дошла од Министерството за здравство. Ние имавме состанок и со министерот за здравство, и до општината доставивме барање за меморијал за жртвите од модуларната болница. Тоа што тие велат дека иницијативата е нивна – тоа не е вистина. Местото каде што ќе биде меморијалот беше определено, и министерот за здравство и градоначалникот слушнаа каде треба да биде. Не таму каде што вчера излегоа, туку на местото каде што беше модуларната болница. За нас, семејствата, ова беше предизборна церемонија – за да се покаже ‘ето направивме нешто за 14-те жртви што изгореа’, но за нас тоа е смешно.“, порача Мумин Исмаили.
Општина Тетово денеска на совет усвои измени на деталниот урбанистички план за поставување на споменикот. Градоначалникот Касами вели дека не е информиран дека според семејствата меморијалот треба да биде на местото каде што беше модуларната болница, но тврди дека барањето дошло од министерството.
„Јас знам дека Министерството за здравство иницијативата ја направи заедно со семејствата. Ако има вакви отстапувања, ќе бидам во контакт и со министерот и со семејствата за да го разјасниме тоа. Инаку, уште еднаш кажувам дека идејата за меморијалниот парк беше координирана со семејствата.“, вели Биљал Касами.
Вчера министерот за здравство заедно со вицепремиерот Азир Алиу, како и пратеници од владината коалиција, оддадоа почит на местото каде што треба да се изгради меморијален парк. Локацијата е близу до местото каде што беше модуларната болница, а на самото место каде што беше болницата сега има паркинг.
