РЕПУБЛИКАНСКИ СЕНАТОРИ СЕ ПРОТИВ ТРАМП: Сакаат да му ги намалат овластувањата за царините
Четворица републикански сенатори се против американскиот претседател Доналд Трамп и сакаат да му ги намалат овластувањата за царините.
Републиканските сенатори Лиза Мурковски од Алјаска, Мич Меконел од Кентаки, Џери Моран од Канзас и Том Тилис од Северна Каролина го поддржаа предлогот што во четвртокот го претставија републиканецот Чак Грасли од Ајова и демократот Марија Кантвел од Вашингтон.
Нивниот предлог-закон ќе ги укине новите тарифи во рок од 60 дена, освен ако двата дома на американскиот Конгрес не ги одобрат. Економистите предупредуваат дека Трамп ризикува рецесија, но Белата куќа вели дека царините за увезената стока ќе поттикнат инвестиции во домашното производство.
Европскиот комесар за трговија Марош Шефчовиќ им кажа на американските претставници дека новите царини од 20 отсто на Трамп за Европската унија (ЕУ) се „неоправдани“, но ја повтори посветеноста на ЕУ за „сериозни преговори“.
Американските медиуми јавуваат дека голем дел од стоките увезени во САД од остатокот од светот почнале да се оданочуваат со дополнителна царина од 10 отсто.
