„РЕПЛЕК“ ОТКРИ КОЛКУ ПАРИ ЌЕ ИНВЕСТИРА ВО СЛЕДНИВЕ ТРИ ГОДИНИ – еве во кои проекти ќе се вложат средствата
Сериозна објава преку Македонската берза за долгорочни хартии од вредност стигна од домашната фармацевтска компанија „Реплек“.
Имено, тие планираат во следниве три години, односно од 2025 до 2027 година, да инвестираат сума од 13 милиони евра, и тоа во дигитализација, автоматизација и подобрување на работните услови, односно бројни проекти во тој домен, а кои треба да го обезбедат планираниот раст на компанијата.
„Во согласност со посветеноста на Реплек АД на раст, иновации и глобална експанзија, компанијата ја продолжува својата инвестициска стратегија насочена кон дигитализација, автоматизација и подобрување на работните услови за вработените. Оваа стратегија има за цел да го поддржи очекуваниот годишен раст од 25 отсто.
Преку овие инвестиции, компанијата ќе ги зајакне своите напори за проширување на портфолиото на производи, зголемување на пазарното учество и дополнително зацврстување на својата конкурентска позиција на пазарот.
За реализација на планираните инвестиции, Реплек АД обезбеди финансиска рамка во износ од 13 милиони евра, која е соодветно обезбедена. Овој капитал ќе го поддржи спроведувањето на планираните инвестициски проекти во периодот 2025-2027 година“, се вели во објавата на компанијата до инвеститорската јавност преку Берзата.
Н.Н.Ф.
