РЕОРГАНИЗАЦИЈА ВО SAP ПОРАДИ ВЕШТАЧКАТА ИНТЕЛИГЕНЦИЈА – што ќе се случи со 8.000 вработени
Германскиот софтверски гигант SAP најави реорганизација на својот бизнис со вештачка интелигенција (ВИ), кој ќе вклучува околу 8.000 вработени.
Пред околу една година, компанијата со седиште во Валдорф укина 3.000 работни места за да ги насочи операциите и да се фокусира на својата основна дејност за развој на софтвер за корпоративно управување.
Сега планираат да го префрлат фокусот на вештачката интелигенција, пишува Seebiz.
ВИ, вработени и преквалификација
„Со планираната програма за трансформација, сè повеќе ги пренасочуваме инвестициите во области за стратешки раст, пред се вештачка интелигенција“, изјави извршниот директор на SAP, Кристијан Клајн.
„Тоа ќе ни овозможи да продолжиме да развиваме пионерски иновации додека ја подобруваме ефикасноста на нашите деловни процеси.
Повеќето од вработените погодени од последното преструктуирање се очекува да поминат низ внатрешна преквалификација или да им бидат понудени доброволни пакети за отпремнина. Од САП велат дека не можат да предвидат колку од тие 8.000 работници ќе останат во компанијата.
Тие очекуваат нивната вкупна вработеност да остане повеќе или помалку стабилна благодарение на инвестициите и плановите за раст во други области. На крајот на 2023 година, SAP имаше 107.602 вработени со полно работно време, во споредба со 106.312 една година порано.
Две милијарди во реструктуирање
Минатата година, SAP воведе производи како што е AI Assistant Joule, што им олеснува на корисниците да извршуваат типични задачи во компаниите.
Според Клајн, SAP сега ќе инвестира уште две милијарди евра во програмата за реструктуирање.
Клајн и неговиот главен финансиски директор Доминик Асам планираат да ја зголемат динамиката на продажбата и профитот во сегментот на облак бизнис оваа година. Прилагодените приходи пред камати и даноци треба да се зголемат за 17 до 21 отсто, исклучувајќи го влијанието на валутни разлики.
Во 2023 година SAP оствари приход од 31,2 милијарди евра, шест отсто поголем од претходната година, објави компанијата.
Нето добивката се зголеми за повеќе од тројно на 5,9 милијарди евра, благодарение на приходите од 12,5 милијарди долари од продажбата на поранешната подружница на SAP во САД за истражување на пазарот, Qualtrics.
Бонитет.ком
Фото: ЕПА
