Реми на Силекс во Анталија, Кожув доби седум парчиња од Пандевци!
Александар Катаниќ, зимското засилување на Силекс беше стрелец на единствениот гол во ремито со Согдијана и ова е второ реми за кратовци по ред, откако пред три дена ремизираа и со Сутјеска Никшиќ со 2-2, а претходно загубија од полска Ресовија Жежов со 1-2.
До крајот на подготовките на Силекс му преостануваат уште пресметките со Динамо Киев во сабота и со Торпедо Кутаиси на 14 февруари. Пред заминување во Анталија, кратовци одиграа реми за загревање со второлигашот Слога Виница.
Пандевци, кои донесоа дури десет засилувања зимава за да направат сериозна реконструкција во тимот и да ја остварат зацртаната цел опстанок, со 7-0 го сомлеа Кожув, во меч на кој Неат Абдулаи даде два гола, а по еднаш во листата на стрелците се запишаа и Димитар Трајков, Георгие Јанкулов, Ване Крстевски, Илија Донов и Иван Галевски.
Пандевци во претходните пет контролки ремизираа со Брегалница 0-0 пред заминување во Анталија, па на турскиот југ загубија од Марица Пловдив со 0-1, од украинска Зарја со 0-2 и казахстански Кижилжар со 0-2, а го победија српски Раднички Ниш со 4-1.
Во недела против Детонит Плачковица ќе ја имаат генералката пред гостувањето во Ѓорче Петров кај Македонија ЃП на стартот од пролетниот дел од сезоната.
Денеска со реми подготовките во Анталија ги заврши Шкендија откако одигра реми 2-2 со летонска Валмиера и со скор од две нерешени и два порази се враќа во Тетово.
