Рекорден интерес за независни кандидатури: 69 иницијативи за градоначалници ќе ја предизвикаат моќта на партиите
Вкупно 69 иницијативи за независни градоначалници и 68 за независни советнички листи се поднесени до Државната изборна комисија (ДИК) по истекот на рокот за собирање потписи на 1 септември. Овие бројки најавуваат рекорден интерес за граѓанско учество на претстојните локални избори и продолжување на трендот на раст на независните листи, кои на минатите избори се етаблираа како четврта политичка сила во државата.
За градоначалничката функција во главниот град, иницијативи за собирање потписи доставиле шестмина кандидати: Ване Цеков, Драган Николовски, Сашо Маневски, Горан Марковски, Сашо Панговски и Демир Исмаил. Сепак, за Советот на Град Скопје беа доставени само две иницијативи за независни листи, предводени од Јана Белчева-Андреевска и Марјан Калевски.
Најголема „гужва“ од независни кандидати за градоначалник има во Прилеп, каде се пријавени дури седум иницијативи, а веднаш по него е Демир Хисар со пет. Интересна е состојбата во Охрид, каде има четири најавени независни листи за советници, но само еден независен кандидат за градоначалник, Гоце Цветковски. Од скопските општини, нема ниту една независна кандидатура за градоначалник во Гази Баба, Ѓорче Петров, Бутел, Илинден и Петровец.
Зголемениот број на иницијативи го потврдува нагорниот тренд на граѓанско организирање во политиката. На локалните избори во 2017 година, независните кандидати освоија приближно 2,74% од местата во општинските совети. Овој удел речиси се дуплираше на изборите во 2021 година, кога достигна историски максимум од 4,97%. Тогаш, 57 независни листи освоија над 65 илјади гласови на ниво на цела држава.
Собирањето потписи е само првиот чекор. Кандидатите кои го исполниле овој услов имаат рок до 13 септември да ги поднесат комплетните листи со сета потребна документација до Општинските изборни комисии (ОИК), кои ќе ја донесат конечната одлука за нивно потврдување.
Локалните избори ќе се одржат на 19 октомври, а вториот круг е закажан за 2 ноември.
