РЕКОРДЕН БУЏЕТ ЗА ОДБРАНА: Русија инвестира милијарди во војска и покрај санкциите
Буџетот за 2025 година предвидува распределба на 13,5 трилиони рубљи (126,8 милијарди долари) за националната одбрана, што е значително зголемување во однос на планираните 10,8 трилиони рубљи за 2024 година.
Тоа значи дека одбраната следната година ќе сочинува 32,5 отсто од федералниот буџет на Русија, наспроти 28,3 отсто оваа година.
Предлог-буџетот беше претставен во септември, а руските пратеници го одобрија во последните десет дена.
Рекорден буџет за војната во Украина
Овој рекорден буџет доаѓа кога војната во Украина се приближува кон својата четврта година, која започнува во февруари.
Иако западните земји воведоа голем број санкции кон Русија поради нејзината инвазија на Украина, режимот на Путин успева да ја одржи економијата, со многу активности насочени кон војската.
Сепак, руската економија е под притисок бидејќи воените активности ја поттикнуваат инфлацијата. Поради ова, Централната банка на Русија ја зголеми основната каматна стапка, која сега е на рекордно ниво од 21 отсто.
Минатиот месец гувернерот на Централната банка изјави дека економијата е на „пресвртна точка“ и дека со забавување на инфлацијата се очекува намалување на каматните стапки.
Падот на рубљата и социјалните притисоци
Рубљата падна на најниско ниво во последните 32 месеци, што укажува на проблеми во руската економија. Путин ги повика граѓаните да не паничат поради падот на вредноста на рубљата.
Аналитичарите на Институтот за проучување на војната оценија дека зголемувањето на буџетот за одбрана не мора да значи и подобрување на воената способност, бидејќи значителен дел од средствата ќе одат за бенефиции за војниците, ветераните и нивните семејства, пишува Business Insider.
– Фокусот на Русија на трошоците за одбрана веројатно ќе влијае на одржливоста на социјалните програми, што може да го отежне Кремљ да ја продолжи војната во Украина со оглед на зголемениот притисок врз економијата – се наведува во извештајот.
„Сосема необична ситуација“
Минатата недела, директорот на една од најголемите руски банки, Андреј Костин од ВТБ, изјави за Ројтерс дека продолжената војна и економската ситуација ќе ја забават руската економија следната година.
– Невозможно е економијата да мине низ вакви настани без последици – рече Костин, но додаде дека економијата се уште е „здрава“.
Костин предвидува дека растот на рускиот БДП ќе забави до 1,9 отсто во 2025 година, што е над прогнозата на Меѓународниот монетарен фонд од 1,3 отсто. Според ММФ, руската економија во 2024 година ќе порасне за 3,6 отсто.
Министерството за економија на Русија предвидува раст од 3,9 отсто оваа година и 2,5 отсто следната година.
– Војната трае речиси три години, а воведени се огромен број санкции. Живееме во сосема необични услови – заклучил Костин.
