Рекорден број на интернет портали регистрирани во ДИК за платено политичко рекламирање
„Слушавте сите заедно, сме имале многу портали што некои јас воопшто не ги знам“, рече потпретседателката на Државната изборна комисија (ДИК) Дитмире Шеку. „Слободни благи рецепти“ беше „најинтересен“ за членовите на Комисијата и присутните на јавната седница која се одржа попладнево.
Рекорден е бројот на интернет портали кои ќе понудат платено политичко рекламирање (ППР) за претстојните претседателски и парламентарни избори во Македонија. Дури 249 портали се пријавиле во ДИК, а уште десетина биле одбиени оти не доставиле валидна тековна состојба, недоставиле ценовници или се пријавиле вон рокот. Одбиена е и една емисија или подкаст кој аплицирал исто така за ППР.
За споредба на последниот изборен циклус во Македонија за локалните избори беа регистрирани: 195 интернет портали, 41 телевизија, 48 радио станици и 10 весници.
Сите национални телевизии (терестријални, кабелски и сателитски) се пријавиле исто така за ППР. Вкупниот број е 37.
35 радио станици од цела држава исто така изразиле подготвеност да емитуваат платена политичка програма.
Најмалку се весниците и магазините. Само 11 ќе се најдат во регистарот кој на својата веб страница треба да го објави ДИК.
На седницата беше потенцирано дека дел од медиумите доставиле цени повисоки од претходно утврдените од страна на ДИК и истите ќе имаат рок од 72 часа да ги корегираат.
Ист е бројот на медиуми кои ќе понудат ППР за претседателските и парламентарни избори, но сепак ДИК изготва два регистри со оглед на тоа што може да имаат различни ценовници медиуми.
За споредба, во 2021 година имаше пријавено 290 медиуми за ППР, од кои 190 беа портали. Тогаш беа потрошени 3,3 милиони евра за изборна кампања.
ДИК пресмета дека, поради паралелните избори, за платено политичко рекламирање ќе биде потребна рекордна сума од државниот буџет – 10,6 милиони евра.
Кампањите ќе се совпаднат меѓу 17 и 22 април, пред првиот круг од претседателските избори и меѓу 25 април и 6 мај пред парламентарните избори и пред многу веројатниот втор круг за избори на шеф на државава, кои треба да се одржат истиот ден, на 8 мај.
Во 2016 година, на последните избори кога партиите од свој џеб ги плаќаа изборните реклами, сите партии потрошиле само 2,5 милиони евра, што е четирипати помалку од предвидената финансиска рамка за двојните избори што следат.
Партиите нема да можат да нарачуваат платено политичко рекламирање во медиуми кои ги нема во регистарот на ДИК и на нив нема да може да им исплаќа пари од трансакциската сметка за изборната кампања.
Првиот круг претседателските избори ќе се одржи на 24 април, а вториот круг за избор на претседател заедно со парламентарните избори ќе биде на 8 мај.
