„REDDIT – ПОЧЕТОК НА КРАЈОТ“: Компанијата излегува на берза, еве кој ќе има најмногу корист

Редит, страницата базирана на „форум“ каде што луѓето споделуваат информации и која за време на своето постоење предизвика многу интернет дискурс (на пример, приказната за GameStop пред три години), поднесе барање за својата долгоочекувана првична јавна понуда.

Овој потег ќе го направи Reddit првата голема компанија која претставува социјална мрежа која излезе на берза по Snapchat во 2017 година. Компанијата го објави потегот пред две години.

Редит ќе им овозможи на најлојалните од своите 70 милиони корисници да поседуваат акции, како што потврди ко-основачот и извршен директор Стив Хафман.

„Нашите корисници имаат длабоко чувство за сопственост на заедниците што ги создаваат на Reddit. Сакаме ова чувство на сопственост да се рефлектира во вистинска сопственост – нашите корисници да бидат наши сопственици“, рече Хафман.

Она што е интересно е дека Reddit „изјави“ во поднесувањето дека има фактор на ризик за целата приказна бидејќи компанијата има „историја на нето загуби и можеби нема да може да постигне или одржува профитабилност во иднина“.

Да, од своето основање во 2005 година, Reddit нема ниту една пријавена година со профит.

Победник – Сем Алтман

Кога станува збор за профитот, еден човек сепак ќе го оствари. Извршниот директор на OpenAI Сем Алтман е долгогодишен инвеститор во Reddit. Од 2014 година тој има инвестирано неколку десетици милиони долари во компанијата, а претпоставката е дека кога компанијата ќе излезе на берза, ќе оствари приход од над 300 милиони долари.

Тој беше член на Управниот одбор на компанијата до 2021 година, а потоа се пензионираше.

„Reddit е пример за нешто што изгледаше како глупава играчка која губи време и стана нешто многу интересно“, напиша тој еднаш.

Сепак, не се сите задоволни од оваа одлука на компанијата.

Пред сè, корисниците.

„Почеток на крајот“, „добро додека траеше“, „сè уништија“, се само дел од коментарите на корисниците на оваа мрежа.

Голем број корисници веруваат дека иницијалната јавна понуда (IPO) што е поднесена до американските регулатори ќе го промени духот на страницата.

„Кога најважните клиенти ќе се префрлат од корисници на акционери, производот секогаш ќе страда“, напиша едно лице.

Бонитет.ком