Речиси 5 тони кокаин запленети во водите на Мартиник: Операцијата е поврзана со убиството на Србин и Македонец во Боливија
Во голема меѓународна акција спроведена во јули, припадници на Министерството за внатрешни работи на Македонија – Управата за криминалистичка полиција (УКП) и Службата за борба против организиран криминал (СБПОК), во соработка со повеќе партнерски служби, запленија 4,8 тони кокаин во водите на Мартиник, Франција.
Операцијата се одвиваше заедно со американската DEA, Заедничката меѓуагенциска работна група Југ (JIATF-S), како и Националната агенција за криминал на Велика Британија (NCA), а координацијата беше обезбедена преку Центарот за поморска анализа и операции – наркотици (MAOC-N) и француската морнарица.
При претрес на бродот „GALEXYR“ – специјализиран реморкер долг 76 метри, наменет за транспорт на цемент – пронајдени се 4.841 килограм кокаин, спакувани во 153 бали. На пловилото биле затекнати 11 лица, претежно државјани на Хрватска и Црна Гора, како и 41-годишниот В. Ѓ. од Србија, кој е уапсен и се наоѓа во притвор.
Според истражните органи, В. Ѓ. е член на т.н. „Балкански картел“ и стои зад компанијата „VTS-Maritime Counsalting DOO“, регистрирана за регрутирање морнари за прекуокеански бродови. Тој поседува и лиценци за управување со повеќе видови пловни објекти.
Истрагата покажува можни врски помеѓу оваа рекордна пратка дрога и неодамнешното тројно убиство во Боливија, при што загинаа членови на „Балканскиот картел“, меѓу кои државјани на Србија, Северна Македонија и Хрватска.
Од СБПОК порачуваат дека акцијата претставува сериозен удар за меѓународните криминални структури и најавуваат продолжување на заедничките активности со партнерските служби во Србија, Европа и пошироко, со цел искоренување на организираниот криминал.
