Реал Мадрид е во финале, кралскиот клуб ќе се бори за светската круна (ВИДЕО)
Немаше изненадување во второто полуфинале на Светското клупско првенство, Реал Мадрид си ја оправда улогата на фаворит и рутински го совлада Ал Ахли.
Отпорот на египетскиот клуб траеше до 42. минута кога Винисиус Жуниор искористи една грешка на одбраната на противникот и со лоб ја смести топката во мрежата за водство од 1-0.
На самиот почеток од вториот дел, Валверде постигна гол за предност на Реал Мадрид и од 2-0.
Во 65. минута Ал Ахли се врати во игра, Малоул постигна гол од пенал и го намали водството на Реал Мадрид на 2-1.
Во 87. минута и Реал Мадрид имаше шанса од пенал да даде гол, но Лука Модриќ не ја реализираше најстрогата казна, голманот одбрани.
Мечот отиде во судиското продолжение во кое Реал Мадрид постигна уште два гола. Прво Родриго во 92. минута зголеми на 3-1, а конечните 4-1 ги постави Арибас кој самошто влезе во игра.
Реал Мадрид во финалето ќе игра против Ал Хилал, а Ал Ахли со Фламенго ќе се бори за третото место.
