Расте извозот на сладолед: Македонија лани извезла 5.260 тони во вредност од 18,2 милиони евра

Македонија лани извезла 5.260 тони сладолед во вредност од 18,2 милиони евра, што претставува раст од 30% во однос на претходната година, покажуваат најновите податоци од Државниот завод за статистика. За исто толкав процент се зголемени и количините извезен сладолед, потврдувајќи дека овој производ станува сѐ поатрактивен на странските пазари.

Извозот на сладолед бележи континуиран раст во последната деценија. Во 2015 година, вредноста на извозот изнесувала само 4,5 милиони евра, што значи дека за 10 години, извозот е зголемен четирикратно.

Особено важно е тоа што Македонија е нето извозник на сладолед, односно извезува повеќе отколку што увезува – што е редок случај во трговската размена на земјата. Во 2024 година, увозот на сладолед изнесувал околу 3.000 тони, со вредност од 11,8 милиони евра.

Со тоа, нето извозниот ефект од трговијата со сладолед лани достигна 6,4 милиони евра, што претставува позитивен сигнал за домашното производство и конкурентноста на македонскиот сладолед на регионалниот и поширокиот пазар.