РАСТАТ ЦЕНИТЕ НА НАФТАТА: Во позадина се вестите од Иран и Русија
Цените на нафтата денеска се зголемија на меѓународните
пазари до 77 долари, бидејќи инвеститорите стравуваат од прекини во
снабдувањето со руска и иранска нафта под притисок на американските санкции.
На лондонскиот пазар цената на барелот по пладне беше
повисока за 59 центи отколку на затворањето на тргувањето вчера и изнесуваше
76,89 долари. На американскиот пазар со барел се тргуваше за 42 центи поскапо,
по цена од 73,98 долари.
Страв дека западните
санкции би можеле да предизвикаат прекин
Расположението на пазарот денеска го одбележаа стравувањата
дека западните санкции би можеле да предизвикаат прекини во снабдувањето со
руска и иранска нафта.
Кабинетот на американскиот претседател во заминување Џо
Бајден има намера да воведе нови санкции кон Русија поради војната во Украина,
соопштија во понеделникот три познати извори, додавајќи дека целта на новите
казнени мерки ќе бидат танкери со руска нафта поскапа од 60 долари за барел.
„Пакетот е многу обемен, (вклучува) две руски нафтени
компании, повеќе од 100 танкери, трговци со нафта, руски осигурителни компании
и така натаму“, рече неименуваниот функционер, наведувајќи ги компаниите.
Ограничувањето на цената од 60 долари го воведе групата Г7.
Дури и ако се продава по повисока цена, купувачите обично добиваат попуст,
вклучувајќи ги и оние во Кина и Индија.
Вашингтон ја
информираше Индија за претстојното воведување санкции
Вашингтон го известил индиското Министерство за надворешни
работи дека наскоро ќе воведе санкции, рече неименуваниот функционер, додавајќи
дека пазарот е „преплавен“ со нафта, а цените се ниски, па Индија лесно може да
ги покрие своите потреби.
Индиското министерство не одговори на барањето на Ројтерс за
коментар за неговите изјави синоќа.
На почетокот на декември и Вашингтон ги заостри санкциите
кон Иран, фокусирајќи се на, како што соопшти Министерството за финансии,
„сивата флота“ која транспортира нафта на странските пазари. Мерките беа
воведени по иранскиот напад врз Израел, додаде Министерството.
Иран одговори со ракетни напади врз Израел на израелскиот
напад врз Техеран, во кој беа убиени лидерот на палестинскиот Хамас, Исмаил
Ханије и еден ирански воен командант.
Тензии меѓу Кина и
САД
Кинеската Shandong Port Group вчера извести дека забранува
приклучување и истовар на танкери под американските санкции, според тројца
трговци. Компанијата управува со пристаништата Чингдао, Рижао и Јантаи со големи нафтени терминали.
Во вакво опкружување зајакна побарувачката на нафта од
Блискиот Исток, па така официјалните цени на саудиската нафта за испораки на
азиските клиенти во февруари пораснаа за прв пат по три месеци.
Изгледа дека трговците почнаа да ги ценат благите ризици во
испораката на иранска нафта во Кина, шпекулира Џовани Стауново од UBS.
Организацијата на земјите извознички на нафта (ОПЕК) одделно објави дека барел
нафтена кошница на нејзините членки во понеделникот поскапе за 29 центи на 76,18
долари.
