Рама: Регионот не смее да стане мал Донбас и да бидеме заложници на Косово и Србија
Според албанскиот премиер, Еди Рама, регионот не смее да стане заложник на односите меѓу Белград и Приштина.
Рама вели дека „линијата меѓу организираниот криминал и локалните политичари е нејасна“, и дека регионот не смее да стане мал Донбас.
„ЕУ треба цврсто да дејствува за да обезбеди брза имплементација на Основниот договор. Нашиот регион не може да стане заложник на бескрајната криза меѓу Косово и Србија! Дискусиите се добри, но на регионот му треба пробив пред да биде предоцна“, додаде Рама.
Генералниот секретар на НАТО Јенс Столтенберг изјави синоќа, по средбата со српскиот претседател Александар Вучиќ, дека НАТО ќе продолжи да го поддржува и обезбедува мирот во рамки на мандатот кој го има на Косово.
Вучиќ изјави дека на Србија ѝ се потребни КФОР и НАТО, кои досега дејствувале професионално на Косово.
Тој истакна и дека на Приштина никој не ѝ верува, „бидејќи нивната цел е да се спроведе политиката на (поранешниот претседател на Албанија) Енвер Хоџа, што значи „Косово без Срби“ и „обединување со Албанија“.
Србија е загрижена затоа што Косово купува модерно турско оружје, но КФОР нагласи дека Бајрактар косовските власти смеат да користат само со нивна дозвола.
Србија по дипломатски пат реагирала до Турција за оружјето.
Односите меѓу Србија и Косово се напнати. Србите бараат формирање на Заедница на српски општини и нови избори на северот, затоа што претходно тие бојкотираа и победија градоначалници Албанци, кои Србите ги сметаат за нелегитимни.
foto Facebook/Edi Rama
