Работничките од Клиничка Тетово бараат итно решение или ќе бараат нови работни места
На денешниот протест, вработените во Клиничка болница Тетово изразија загриженост поради неизвесноста околу нивниот статус и најавија дека ќе мораат да бараат нови работни места доколку проблемот не се реши наскоро.
„Трпението има лимит. Јас лично ќе се откажам ако не се слушне нашиот проблем“, рече Магдалена Велковска, една од протестантките.
Ивона Неделковска истакна дека вработените се заменливи, како што им било кажано од директорот, и дека во случај на неразрешување на статусот ќе бидат отпуштени без права. „Јас ја напуштам работата бидејќи моето семејство не може да трпи поради неизвесноста и немањето плата“, додаде таа.
Главната сестра на Клиничка Тетово, Линдита Заими, порача дека проблемот со договорите на дело не е само локален, туку се јавува низ целата земја. Таа апелираше вработените да формираат работна група и нагласи дека се чека трајно решение од министерството.
„Ова се наследени проблеми, а конкурсот и одлуките се на повисоко ниво. Се надевавме дека ќе бидат реализирани, но сега чекаме одлука од новиот министер“, рече Заими.
