Работнички со неверојатна серија 20-0 го „скрши“ отпорот на ТФТ (ФОТО)

14/12/2023

Кошаркарите на Работнички полека, но сигурно се враќа во „живот“ по шокантниот пораз на домашен терен од Феникс, а по неодамнешниот триумф кај Гостивар вечерва дојдоа до уште една гостинска победа и тоа кај „соседот“ ТФТ (72-57) и тоа далеку полесно од очекувањата.

Црвено-белите беа подобар противник во сите 40 минути, но клучната предност ја остварија на крајот од третиот период и почетокот на последниот период, кога од 47-43 со неверојатни 20 поени по ред дојдоа до плус 24 (67-43) со што ги обезбедија посакуваните бодови.

Роберт Рикиќ со 14 поени беше најпрецизен кај победничкиот тим, додека го следеа Декоси со 13 поени и седум скока и Стојан Ѓуроски со 11 поени и 10 скока. Виктор Ташовски со 16 поени беше најефикасен кај ТФТ.

Ова беше втор меч од 12. коло од Првата лига, во кое синоќа МЗТ го совлада Кожув, а Пелистер беше подобар од Гостивар. Останатите средби се играат викендов.