Работнички падна на крај: МЗТ се намачи, но го направи првиот чекор кон финалето (ФОТО)

Тоа беше тврд и неизвесен натпревар до пред самиот крај, а како клучна се покажа серијата 15-3 на аеродромци во првата половина од последната четвртина, со која целосно го скршија отпорот на гостинскиот тим. Центарци на 57-58 имаа и напад за водство, но потоа следеа 11 поени во низа на сино-белите, за малку подоцна да дојдат и до највисоки дотогаш плус 13 (73-60), што беше најава на крајниот епилог.

Дамјан Стојановски беше прво име во тимот на МЗТ Скопје со 14 поени и 11 скока, додека зад него беа Дастин Вер и Кеандре Кук со по 13 поени, како и Војдан Стојановски со 12 поени и седум скока. Ѓорѓе Џелетовиќ со 19 поени и девет скока беше најдобар кај Работнички.

Вториот дуел од серијата се игра в среда, кога составот од Аеродром ќе ја има првата шанса за пласман во финалето со оглед што се игра до две победи.