Путин соопшти кој стои зад терористичкиот напад во Москва
Рускиот претседател Владимир Путин денеска изјави дека терористичкиот напад во Москва е дел од нападот на режимот во Киев врз Русија. Путин рече дека нападите ги извршила Исламската држава, но додаде дека официјалните лица не знаат „кој го наредил“, пренесува Ројтерс.
„Ние сме заинтересирани кој има корист од тоа“, рече Путин, додавајќи дека нападот е „чин на заплашување“.
Знаеме дека злосторството го извршиле радикални исламисти, против чија идеологија со векови се бори самиот исламски свет“, рече Путин, пренесува РИА Новости.
Тој додаде дека е неопходно да се одговори на прашањето зошто терористите се обиделе да заминат во Украина по нападот во руската престолнина.
Тој рече дека оние кои го планирале терористичкиот напад имале намера да предизвикаат паника во руското општество, но, како што наведе, се соочиле со решителен одговор.
Според последните податоци, во петокот вечерта во терористички напад на концертна сала во предградието на Москва загинаа 137 лица, меѓу кои три деца, а околу 180 лица се повредени.
