ПУТИН КАКО НЕЗАВИСЕН КАНДИДАТ Половина милион потписи за поддршка за номинацијата на актуелниот шеф на руската држава за претседателските избори
Низ Русија се собрани повеќе од половина милион потписи за поддршка на номинацијата на актуелниот претседател Владимир Путин за претседателските избори во март 2024 година, соопшти денеска прес-службата на изборниот штаб на Путин.
Првата серија на потписи за поддршка на номинацијата на актуелниот шеф на државата за новиот претседателски мандат денеска ја донесоа активисти од Московската област во изборниот штаб на Путин.
Според законот, независен кандидат мора да собере најмалку 300.000 потписи за поддршка, а од секоја административна единица на Руската Федерација мора да добие писмена поддршка од најмалку 7,5 илјади луѓе кои живеат во таа област. Потписите треба да се достават до Централната изборна комисија до 31 јануари, по што ќе бидат заверени и разгледани сите останати документи, а во рок од десет дена ќе се донесе одлука дали кандидатот ќе биде официјално пријавен за изборите или не.
Група гласачи кои го поддржуваат Путин е регистрирана на 20 декември, а актуелниот шеф на државата на 18 декември поднел документи до ЦИК како независен кандидат. Претседателските избори во Русија се закажани за 17 март, а гласањето ќе трае три дена, од 15 до 17 март.
