ПУКАЊЕ ВО БРИСЕЛ Четири лица повредени, едно лице се бори за живот

Најмалку четири лица се повредени вечерва во престрелка во Брисел, соопшти локалната полиција.

Според медиумите, не се работи за терористички напад, а весникот „Ле Соар“ наведува дека животот на едно лице е во опасност. Како што истакна градоначалникот, постои сомнеж за „пресметка на локални банди“.

– Добивме дојава за пукање што се случи на авенијата де ла Тоасон д’Ор околу 19 часот и 30 минути. Нашите служби веднаш излегоа на местото на настанот – изјави портпаролката на полицијата Илсе Ван де Кеер.

„Тие се криеја кај мене“

Според локалните медиуми, насилникот побегнал од местото на пукањето кога пристигнала полицијата, додека еден сведок опишал како изгледало пукањето.

– Неколку лица дојдоа да се сокријат, кога еден човек дошол на средината на авенијата и почнал да пука. Тој пукал неколку пати. Дваесетина луѓе дојдоа во мојот локал да се засолнат, меѓу нив и турист кој се здоби со повреда на ногата – објаснил сопственик на блиска кафеана.

Се чека соопштение од обвинителството.