Прва самостојна изложба на свадбена фотографија во Македонија
Со изложбата насловена „A Decade of Love Stories“, фотографски бренд од Македонија одбележа значаен јубилеј – десет години посветена работа во областа на свадбената фотографија. Настанот претставува прва самостојна изложба во земјава која е целосно фокусирана на свадбениот кадар, со што овој жанр се поставува во рамките на современата визуелна уметност.
Авторите Ванчо Попов и Златко Димитров преку внимателно избрана селекција фотографии ја прикажаа својата децениска работа, документирајќи интимни моменти, емоции и приказни од најважните денови во животот на нивните клиенти. Изложбата, покрај естетската вредност, има за цел и да ја афирмира свадбената фотографија како сериозен уметнички израз на домашната сцена.
Организаторите истакнуваат дека ова е првпат во Македонија еден фотографски бренд да реализира ваков концепт, посветен исклучиво на свадбената фотографија. Со тоа, како што велат, се отвора нов простор за препознавање на овој жанр не само како услуга, туку и како форма на уметност.
Во рамки на изложбата беа претставени фотографии кои ја доловуваат атмосферата, емоциите и уникатноста на секоја љубовна приказна, создадени во изминатите десет години. Авторите изразуваат благодарност за поддршката што ја добивале низ годините и најавуваат нови проекти во иднина.
