Проверете дали сте во избирачкиот список, од денеска почна јавниот увид

Во пресрет на локалните избори закажани за 19 октомври, денес започна јавниот увид во Избирачкиот список кој ќе трае до 11 септември на полноќ. Државната изборна комисија (ДИК) ќе го заклучи и потпише Избирачкиот список најдоцна на 3 октомври.

Претседателот на ДИК, Борис Кондарко, ги повика граѓаните во периодот од 23 август до 11 септември да извршат проверка на своите податоци во подрачните одделенија на Комисијата. Одделенијата ќе работат секој ден од 8 до 20 часот, вклучувајќи викенди и празници, а на последниот ден ќе бидат отворени до полноќ.

Секој граѓанин кој ќе забележи неправилност може писмено или електронски да поднесе барање за запишување, промена или бришење на податоци, со приложување на соодветни докази. ДИК е должна да донесе одлука по секое барање во рок од 24 часа, а против одбивачко решение граѓаните можат да поднесат тужба до Управниот суд, кој одлучува во рок од еден ден.

Увид во Избирачкиот список е овозможен и за лицата кои се во затвор или притвор, преку органите надлежни за извршување санкции.

Политичките партии имаат право да побараат копија од Избирачкиот список до 11 септември, а ДИК ќе им го достави најдоцна до 14 септември. Партиите потоа, до 19 септември, можат да поднесат барање за промени, на кое Комисијата е должна да одговори во рок од три дена.

Покрај тоа, во рокот до 18 септември, податоци за нови полнолетни лица, затвореници и лица во установи за згрижување ќе достават МВР, Министерството за социјална политика и основните судови.

Оконечениот Избирачки список со сите извршени промени ќе биде заклучен на 26 септември, а финално потпишан од ДИК најдоцна на 3 октомври.