ПРОТЕСТИТЕ ЗА ВАРДАРИШТЕ СЕ РАДИКАЛИЗИРААТ: Граѓаните денеска од 15 до 18 часот ќе го блокираат мостот „Близнак“
По повеќе недели секојдневни собири, граѓаните кои бараат трајно решение за дивата депонија Вардариште најавија интензивирање на протестите. Преку социјалните мрежи, тие информираа дека денеска ќе влезат во нова, порадикална фаза на изразување на револтот, со целосна блокада на мостот „Близнак“.
Блокадата, како што е најавено, ќе се одржи во периодот од 15 до 18 часот.
Жителите на Аеродром, Ново Лисиче и околните населби го продолжуваат својот притисок врз институциите поради неподносливата миризба и загадениот воздух кои со недели доаѓаат од депонијата.
Протестите беа иницирани по последниот голем пожар на Вардариште, кој освен што со денови го загадуваше воздухот, предизвика и прекин во снабдувањето со електрична енергија во повеќе скопски населби.
