Протест на вработените од УЈП: Бесими не дава согласност за новиот Колективен договор
Вработените во Управата за јавни приходи ќе одржат протест, на кој ќе го изразат своето незадоволство кон Министерот за финансии г-дин Фатмир Бесими, поради недавањето согласност од негова страна за потпишување на новиот Колективен договор на Управата за јавни приходи.
Протестот ќе се одржи денес со почеток во 11 часот пред зградата на Министерството за финансии.
Во содржината на посочениот договор е утврдено зголемување на платите на вработените во Управата за јавни приходи, а претходно работни групи делегирани од работодавачот и репрезентативната синдикалната организација Солидарност изготвија и заеднички ја прифатија содржината на новиот Колективен договор на ниво на работодавач.
„Бидејќи до ден денес, од неразбирливи причини согласноста за потпишување на договорот сеуште не е добиена, а вработените во управата не можат да го остварат своето право на повисоки плати, решија да го одржат денешниот протест. Кога сме кај платите на вработените во Управата за јавни приходи состојбата е повеќе од поразителна и разочарувачка. За 14 години нивните плати се корегирани само за 5% а во последните 4 години ниту еден денар.
Никој не сака да го цени фактот дека станува збор за вработени во државната управа, кои се единствени во децениските активности на хуманитарни и донаторски акции со што ја искажуваат својата општествената одговорност.
Никој не може да го негира фактот дека токму тие се единствените кои од сопствените плати издвоија милионски износи кои беа уплатени во фондот за справување со Covid пандемијата кога целото општество беше во шок.
Имајќи ја во предвид решеноста на вработените во управата да ги искористат сите механизми за да го остварат ова свое основано право, ја искажуваме нашата загриженост поради можноста да настанат непосакувани состојби, предусловени од неисполнување на работни задачи и обврски на вработените при евентуално одржување на генерален штрак на што се инсистира од нивна страна.
Што тоа би значело за целото општество сите треба да бидеме свесни.
Во исто време имаме заедничка обврска секој поединечно и сите заедно со изнаоѓање на решение, а тоа е давање согласност за потпишување на веќе прифатениот колективен договор истото да го спречиме“, соопштија од Синдикалната организација „Солидарност“.
