Проширување на истрагата за трагедијата во Кочани: Притвор за 24 лица, меѓу нив и тројца градоначалници

Истражните органи ја интензивираат истрагата за катастрофалниот пожар во ноќниот клуб „Пулс“ во Кочани, во кој на 16 март животот го загубија 59 лица, а околу 200 беа повредени. Јавното обвинителство информира дека обвинителскиот тим е проширен на 11 јавни обвинители, кои спроведуваат обемни активности, вклучително и распит на над 300 сведоци, вештачења од повеќе области и детална проверка на документацијата поврзана со работењето на локалот.

Во првата фаза на истрагата се опфатени 34 осомничени лица, од кои 27 физички и 3 правни лица, како и 7 полициски службеници од СВР Штип и ПСОН Кочани. Дел од нив се товарат и за примање поткуп.

Притвор од 30 дена е одреден за сите 24 лица за кои Обвинителството поднесе барање, меѓу кои и тројца градоначалници на Кочани: актуелниот во оставка Љупчо Папазов, како и поранешните Ратко Димитровски и Николчо Илијев. Меѓу осомничените е и поранешниот министер за економија Крешник Бектеши.

Претходно, на 16 март, веднаш по несреќата, беше формиран обвинителски тим од петмина обвинители од Кочани, Штип и Скопје, кој потоа се прошируваше двапати, поради сложеноста на случајот.

Премиерот: Огромни неправилности во 70–80% од јавните објекти

Паралелно со истрагата, Владата спроведува интензивни инспекциски контроли во јавни и угостителски објекти низ државата. Премиерот Христијан Мицкоски изјави дека во 70–80 проценти од објектите се забележани сериозни неправилности, што, според него, не се исклучоци, туку „пракса која повеќе нема да се дозволи“.

Затворени 10 локали, 15 со лиценца не исполнуваат технички услови

Портпаролката на Владата, Марија Митева, информираше дека изминатите денови биле спроведени 116 вонредни надзори, по што биле изречени 10 решенија за привремена забрана за работа и издадени 59 прекршочни платни налози во вкупен износ од над 520.000 денари.

Најавени се нови инспекции во објекти за прослави, со акцент на проверка на категоризација, технички услови и лиценци.

ЗЕЛС: Јавните установи се безбедни, следуваат контроли и во станбени згради

Претседателот на ЗЕЛС и градоначалник на Кисела Вода, Орце Ѓорѓиевски, изјави дека по вонредните контроли училишта, градинки, културни домови и спортски сали се безбедни, но најави строги контроли и во станбени згради и урбана опрема поставена од општините.

Граѓански протест: „Бараме одговорност, безбедност и транспарентност“

Синоќа во Скопје се одржа протестен марш, организиран од граѓанската иницијатива „Кој е следен?“, кој започна со триминутен молк, палење свеќи и полагање цвеќе за жртвите од трагедијата. Протестот продолжи до Владата, каде учесниците бараа транспарентна истрага и одговорност од институциите.

Политичките реакции: Повик за транспарентност и правда

Опозициската СДСМ побара да нема селективност во истрагата, со целосно разгледување на евентуалните пропусти на МВР. Од ДУИ порачаа дека молкот заврши и дека „време е да се зборува“, обвинувајќи ја власта за обид за префрлање вина без да се почекаат фактите.