Проширен надзорот во М-НАВ, имало претставки на кандидати кои се јавиле на последните огласи за вработување
Државниот инспекторат за труд (ДИТ) го прошири надзорот во М-НАВ.
Директорката на ДИТ, Весна Томовска во изјава за МИА истакна дека проширувањето на надзорот е по претставки на кандидати кои се јавиле на последните огласи за вработување и имаат и анонимна претставка за синдикатот.
„Добиени се дополнителни претставки, надзорот ќе продолжи понатаму. Затоа што надзор ќе се изврши и во Агенцијата за вработување, а исто така ќе се постапи и по новопримените претставки од страна на неизбраните кандидати. Значи имаме претставки од двајца неизбрани кандидати, имаме претставка од анонимен подносител членови на синдидатот и таа ќе ја дадеме во обработка. Што значи ќе се прошири надзорот и ќе ни треба повеќе простор и време“, вели Томовска.
Според неа, се очекува во текот на неделата и координативен состанок и со Финансиска полиција, а на кој треба да разгледаат од двете области до каде се со надзорот во М-НАВ.
Таа додава и дека инспекторите кои работат на овој надзор имаат обемна документација и работат и до 18 или 19 часот.
