Промени во Пелистер: Радуловиќ место Илиевски, кој не си оди од клубот!
До неочекуваната промена на позицијата дојде денеска откако 48-годишниот стручњак одлучи да се повлече и своето место да му го отстапи на пет години помладиот помладиот Дарко Радуловиќ. Илиевски донесе ваква одлука од здравствени причини кои и претходниот период му правеа проблеми. Сепак, тој ќе остане во Пелистер, но во иднина ќе биде генерален менаџер на клубот и од стручен аспект ќе му помага на својот наследник.
Радуловиќ со ова се враќа во македонската кошарка по пауза од 20 месеци. Последен пат во земјава работеше во МЗТ Скопје со кого освои двојна круна во сезоната 2021/22, но се раздели со клубот по неуспехот во финалето од Купот на Македонија кога аеродромци загубија од ТФТ. Во меѓувреме, популарниот Радуле работеше во косовскиот Башкими и во унгарскиот Нирегихаза, а летово имал понуди од неколку европски и азиски клубови. Пелистер ќе биде негов трет клуб во Македонија бидејќи пред МЗТ Скопје го водеше и Вардар каде и ја почна својата тренерска кариера.
Своето деби на новата позиција, Радуловиќ ќе го има в сабота, во дербито против Работнички, а идната недела ќе го води Пелистер на првиот АБА 2 турнир што ќе се одржи во Суботица.
