Продолжуваат вонредните контроли на локалите
Општинскиот инспекторат на Битола, во координација со Државниот пазарен инспекторат и Секторот за внатрешни работи (СВР) Битола, најави проширени контроли во угостителските објекти низ градот. Контролите ќе бидат насочени кон кафе баровите и локалите, особено оние лоцирани на Широк Сокак, во старата битолска чаршија и на просторот околу Новиот пазар.
Како што информираат од Општинскиот инспекторат, контролите ќе вклучуваат проверка на целокупната потребна документација согласно Законот за угостителска дејност, вклучително и лиценци, решенија и дозволи за работа.
Покрај тоа, инспекциските служби ќе вршат увид и во поставувањето на урбаната опрема пред локалите – практика која редовно се контролира, но сега ќе биде дел и од зајакнатите активности на терен.
Целта на засилените контроли е да се обезбеди почитување на законските одредби и да се подигне нивото на ред и хигиена во најфреквентните делови од Битола, велат надлежните институции.
