Продолжуваат градежните активности на улицата „Љубљанска“ – мостот во Карпош конечно ќе биде ставен во функција
Градоначалникот на Град Скопје, Орце Ѓорѓиевски, денес изврши увид во продолжувањето на градежните активности на улицата „Љубљанска“, со што по долг период на застој повторно се активира проектот за ставање во функција на мостот во општина Карпош.
Како што истакна градоначалникот во објава на своите социјални мрежи, продолжувањето на изградбата ќе овозможи воспоставување клучна сообраќајна врска од интерес за целото Скопје. „Конечно, по долг период на застој, продолжува изградбата на улицата ‘Љубљанска’, со што ќе се пушти во употреба мостот во Карпош“, напиша Ѓорѓиевски.
Тој посочи дека довербата што ја добил од граѓаните претставува обврска за решавање на долгогодишните инфраструктурни проблеми. „Со задоволство можам да информирам дека продолжува реализацијата на проектот за поврзување на улицата ‘Љубљанска’ со ‘Скупи’, со што овој важен мост на реката Вардар конечно ќе биде ставен во функција на граѓаните“, рече градоначалникот.
Проектот беше стопиран поради потребата од обезбедување мислење и дозвола од Конзерваторскиот центар за заштита на локалитетот „Скупи“, согласно законската регулатива. Со обезбедувањето на дозволата, културното наследство е заштитено, а градежните активности продолжуваат со засилен интензитет.
Со комплетирањето на делот од мостот до улицата „Скупи“, се очекува воспоставување на клучна сообраќајна врска меѓу северниот и западниот дел на Скопје. Ова ќе значи подобар пристап до Злокуќани, Бардовци и Индустриската зона, значително растоварување на булеварите „Партизански одреди“ и „Илинденска“, како и побрз и побезбеден излез кон обиколницата.
Проектот предвидува отворање на нова современа сообраќајна оска и функционално решение за влезот во селото преку кружен тек или адаптивна семафоризација, во зависност од сообраќајните потреби.
„Нашата цел е намалување на сообраќајниот метеж, целосна заштита на културното наследство кај локалитетот ‘Скупи’ и обезбедување безбеден и ефикасен проток за возила и пешаци. Унапредувањето на патната и сообраќајната инфраструктура е еден од нашите врвни приоритети, затоа што директно значи подобар квалитет на живот за сите. Скопјани заслужуваат функционален, поврзан и модерен град“, истакна градоначалникот.
