Продолжува судскиот процес за случајот со родилката од Дебар
Во Основниот суд во Струга за денеска е закажано ново рочиште за случајот со родилката од Дебар Јилдз Веапоска, на која по породување со царски рез во Струшката општа болница и беа отстранети матка, јајник и бубрег.
На барање на одбраната судечкиот судија Јордан Јованов, на последното рошиште пред два месеци, донесе решение Медицинскиот факултет во Скопје да одговори зошто биле избрани надворешни членови при носењето на одлуката.
Адвокатскиот тим на обвинетите лекари гинекологот Мухамед Асани, неговиот син доктор Блертон Асани и доктор Лилјана Јованоска, Игор Петковски,образложи дека комисијата, која го изработи супер вештачењето требало да биде составена од професори на Медицинскиот факултет – Скопје. Во случајот само еден од членовите бил од таа институција, додека останатите двајца, биле професор од Медицинскиот факултет во Штип и докторка која имала своја приватна здравствена ординација.
Оштетената Веапоска повтори дека очекува правда и оти благодарение на супер вештчаењето се надева дека ќе произлезе.
Барањето за супер вешташење до Медицинскиот факултет во Скопје Судот го испратил по рочиштето одржано на 23 април минатата година, за што чекаше одговор скоро 10 месеци. Одлуката беше донесена поради неусогласување на вештачењата на вешти лица од Судска медицина побарано од Обвинителството и на техничкиот советник на барање на обвинетите. Според вештачењето на тројцата вештаци од Институтот за судска медицина, влошувањето на состојбата на Веапоска дошло поради погрешни постапки од здравствените работници, додека вештачењето на техничкиот советник професор доктор Драге Дабески покажало дека обвинетите лекари не направиле пропуст при лекувањето на родилката, туку со дејствувањето и бил спасен животот.
Судскиот процес со родилката од Дебар Јилдз Веапоска, на која по породувањето со царски рез, во Болницата во Струга и беа отстранети три органи три пати почнуваше од почеток поради менување на судечките судии, а делото застарува во 2026 година.
