Приведени четворица струмичани за кражба на 160 вреќи компир од камион
Полицијата од Струмица идентификува и приведе четири лица осомничени дека во ноќта меѓу 28 и 29 ноември од паркиран камион „Мерцедес“ со тетовски регистарски ознаки украле 160 вреќи компири. Камионот бил сопственост на К.С. од селото Горна Речица, информираа од СВР Струмица.
Според соопштението, полициските службеници ги лишиле од слобода Ј.А. (40), М.А. (34) и Р.Д. (31), сите од Струмица. На службен разговор бил повикан и И.А. (38), кој исто така се сомничи дека заедно со останатите учествувал во кражбата.
Лицата, како што наведува полицијата, го признале делото, а од Ј.А. и М.А. биле одземени сите 160 вреќи компир, кои потоа им биле вратени на сопственикот.
За случајот е известен јавен обвинител од ОЈО Струмица. По целосно документирање на настанот, против осомничените ќе следува соодветна кривична пријава.
