Приведен струмичкиот бизнисмен Ристо Крмзов
Преку координирана акција на Министерството за внатрешни работи – Бирото за јавна безбедност, Министерството за финансии – Управата за финансиска полиција и Управата за јавни приходи, под раководство на надлежен јавен обвинител, денеска започна реализацијата на широка истрага насочена кон разоткривање на организирана криминална мрежа, пишува Република.мк.
Во раните утрински часови, по налог на обвинителството, се спроведени претреси и приведени се повеќе лица осомничени за финансиски криминал, меѓу кои и бизнисменот Ристо Крмзов, за кој со години постоеле сомнежи за блиски врски со политички и економски центри на моќ.
Според првичните информации, предметот се однесува на организирана шема за нелегален поврат на данок на додадена вредност (ДДВ), преку фиктивни трансакции, лажни фирми и користење на идентитети на непостоечки лица, главно од Косово и други земји. Сомневањата укажуваат дека добивките од овие активности се пренесувале преку државни исплати, потоа се переле и легализирале во градежниот сектор.
Во истрагата се опфатени вкупно 15 правни и 23 физички лица, а се очекуваат и дополнителни приведувања и проширување на истрагата.
Надлежниот јавен обвинител кој го води случајот изразил решителност дека предметот ќе биде третиран со интегритет, а целта е демонтирање на, како што се наведува, длабоко вкоренета политичко-криминална структура која функционирала подолг временски период.
Од институциите засега нема официјална изјава, но се очекува повеќе информации да бидат споделени во текот на денот.
