Приведен Александар Нацев, сопственик на фирмата која ја обезбедувала Пулс и не забранила влез на нелегална пиротехника и малолетници
Обвинителството го прошири предметот за трагичниот пожар во дискотеката „Пулс“ во Кочани, во кој животот го загубија 62 лица, а над 200 беа повредени, со новоосомничениот Александар Нацев. Според Обвинителството, тој се смета за реален сопственик и одговорно лице на агенцијата за обезбедување која нелегално вршела дејност во дискотеката без основен договор и без спроведени безбедносни протоколи.
По наредба на суд, биле извршени претреси на две локации – во Скопје и Пробиштип. Одземена е обемна документација и електронски уреди кои, според надлежните, ќе придонесат за утврдување на фактите во истрагата. Александар Нацев е приведен, а Обвинителството најави поднесување на предлог за притвор пред Основниот кривичен суд во Кочани.
„Агенцијата за обезбедување, без склучен договор со дискотеката ‘Кабаре ПУЛС’, вршела незаконска дејност во текот на 2025 година. Осомничениот Нацев ја координирал работата на терен без потребна безбедносна проценка, план за евакуација или проценка на ризик од пожар. Во критичната вечер не е воспоставена контрола на влезот, присутни биле малолетници, просторот бил пренатрупан, а допуштен е и внес на пиротехника од страна на музичкиот состав – што директно доведе до настанување на пожарот“, информираа од Обвинителството.
Во трагедијата, според официјалните податоци, загинаа 62 лица, 157 беа тешко повредени, а уште 54 се здобија со полесни телесни повреди.
Александар Нацев, кој потекнува од Пробиштип, има долга историја на учество во политиката и државните институции. Во периодот од 2015 до 2017 година бил директор на Дирекцијата за заштита на класифицирани информации во време кога Владата ја предводеше Никола Груевски. Нацев беше и портпарол на ВМРО-ДПМНЕ, а во моментов е извршен директор на Центарот за безбедносни истражувања и професор на Факултетот за државна безбедност.
Обвинителството најавува продолжување на истрагата и можно проширување со нови инволвирани лица, додека јавноста сè уште бара одговорност за една од најголемите трагедии во поновата историја на земјата.
