Приватните градинки со предлог до државата за субвенции од 250 евра по дете за да се намалат листите на чекање

Асоцијацијата на приватни градинки „Полет“ предложи државата да го субвенционира престојот на 1.260 деца во 20 приватни градинки низ земјава, со буџет од 3,78 милиони евра.

„Секоја вклучена фамилија би добила ваучер од 250 евра месечно, што би покрило најголем дел од трошоците за престој. Посебно е значајно што 5 до 10 отсто од децата би биле од ранливи категории, за кои престојот ќе биде целосно бесплатен“, изјави за „Сакам да кажам“, Билјана Караманолевска од градинката „Светот на Колорес“.

Караманолевска истакнува дека само околу 30% од децата на возраст од 0 до 6 години во Македонија се опфатени со предучилишно образование – значително помалку во споредба со развиените земји. Таа нагласува дека предучилишното воспитание е клучно за развојот на децата, но и за создавање подобро и поефикасно општество.

Асоцијацијата веќе одржала средба со министерот за социјална политика, демографија и млади Фатмир Лимани, како и со претставници на Светска банка и УНИЦЕФ во Македонија. Сепак, од Министерството информираат дека официјален документ сè уште не е доставен.