Притвор за Бектеши, Трајковски и уште 12 лица осомничени за пожарот во „Пулс“
Судија на претходна постапка им одреди 48-часовен „краткотраен притвор“ на поранешниот министер за економија Крешник Бектеши, поранешниот директор на Државниот пазарен инспекторат Горан Трајковски и уште 12 лица осомничени за пожарот во дискотеката „Пулс“ во Кочани.
Основниот суд во Кочани го прифати барањето на обвинителството и изрече мерка притвор за сите 14 осомничени лица. Како што информираа од Судот, мерката е определена во траење од 48 часа, во согласност со предлогот на Обвинителството.
Во своето соопштение, Судот наведе дека продолжува со постапување по предметот во врска со трагедијата во „Пулс“, во која животот го загубија 59 лица, а 155 беа повредени.
Државниот јавен обвинител Љупчо Коцевски, на вчерашната прес-конференција, изјави дека се работи на итно процесуирање на осомничените. Според него, тие се товарат за „тешки дела против општа сигурност“ според член 292 од Кривичниот законик, за што е предвидена казна затвор од најмалку три години, а во зависност од тежината, казната може да достигне и до 20 години. Исто така, се испитуваат можни случаи на примање и давање поткуп, како и незаконска набавка на пиротехнички средства.
-Во моментов, истрагата активно ги процесуира 14 осомничени лица. Досегашните анализи покажуваат дека сите релевантни докази од местото на настанот се обезбедени, а дополнителните вештачења се во тек. Оваа недела може да биде донесена одлука за поведување истражна постапка – изјави Коцевски.
Во текот на вчерашната вечер, на сослушување во Основното јавно обвинителство Кочани беа спроведени Крешник Бектеши, Горан Трајковски и уште едно лице. Претходно на испитување беше повикан и градоначалникот на Кочани, Љупчо Папазов. Обвинителството дополнително ќе одлучи за неговиот статус во истрагата.
-Градоначалникот даде исказ и одредени појаснувања. Неговиот исказ ќе биде спореден со материјалните докази и надлежностите на општината, по што ќе биде донесена одлука за неговата натамошна улога во постапката – соопштија од Обвинителството.
Прелиминарните наоди на институциите укажуваат дека во дискотеката „Пулс“ немало функционална противпожарна заштита, хидрантска мрежа и доволно противпожарни апарати. Пиротехничките средства биле користени нелегално, објектот немал важечка лиценца за работа, а не бил склучен ниту писмен договор меѓу организаторот на настанот и музичката група што настапувала таа вечер.
