Притвор за 24-годишник од Волково, осомничен за полови дејствија врз четиригодишно девојче
Основното јавно обвинителство Скопје отвори истражна постапка против 24-годишен жител на скопското село Волково, поради постоење на основано сомнение дека извршил други полови дејствија врз девојче родено во 2020 година. На барање на обвинителството, судот му одреди мерка притвор во траење од 30 дена.
Според наводите од истрагата, осомничениот, кој е во роднинска врска со жртвата, во повеќе наврати во неговиот дом извршил полови дејствија врз детето.
Тој ја искористувал близината и довербата, со оглед на тоа што живееле во одвоени куќи во ист двор. Според обвинителството, осомничениот ги вршел дејствијата кога девојчето било кај него, а потоа ѝ се заканувал да не кажува на нејзиниот татко, велејќи ѝ дека ќе ја караат и тепаат.
Поради сериозноста на делото и потребата за заштита на жртвата од можноста за повторен контакт со осомничениот, јавниот обвинител побарал определување на мерка притвор. Како дополнителни причини биле наведени и опасноста од бегство и можноста осомничениот да влијае врз истражната постапка.
Судија на претходна постапка од Основниот кривичен суд Скопје го прифатил предлогот и на осомничениот му определил триесетдневен притвор.
