Пристигна долгоочекуваниот лек Трикафта на Клиниката за детски болести
Утрово на Клиниката за детски болести пристигна долгоочекуваниот лек Трикафта. Уште утре осум пациенти кои страдаат од цистична фиброза и кои се во најкритична состојба ќе започнат со едногодишна терапија. Веста ја објави министерот за здравство Фатмир Меџити кој додаде дека се работи на тоа лекот да се обезбеди и за другите пациенти.
-Сакам да ве информирам дека на Универзитетската клиника за детски болести пристигна лекот Трикафта за цистична фиброза. МЗ во соработка со сите надлежни институции го реши најитното прашање за оваа категорија пациенти и очекуваме оваа терапија видно да им го подобри квалитетот на живот на пациентите со цистична фиброза-рече Фатмир Меџити.
Двајца од осум пациенти се во тешка здравствена состојба и се лекуваат на Клиниката за пулмологија а шестмина други на Клиниката за детски болести. Со примање на лекот Трикафта се очекува пациентите да имаат поквалитетен живот, вели директорката на Детската клиника која даде појаснување околу ефектот на таблетите.
„Институциите дејствуваа со задоцнување, бидејќи веќе едно лице го загуби животот, вели претседателката на Асоцијацијата за цистична фиброза, Ивана Атанасоска која боледува од оваа ретка болест. Таа во моментов е хоспитализирана. Вели дека со радост ја примила веста за лекот.
„Мислам дека смртта на пациентот влијаеше на забрзување на процедурите, дотогаш слушавме само ветувања, но реално решение не видовме. Секако дека доцнеа, и ние како здружение доцневме со нашите протести, можеби требаше порано да почнеме, во секој случај, изгубен е живот и ова е најважното нешто што не успеавме да го спасиме. Се надевам дека вакви работи нема да се случат.“, изјави Атанасоска.
Бидејќи лекот го набавија по малку поевтина цена, со буџетот кој што е на располагање, побарано е од ФЗО да набави терапија и други четворица пациенти, рече професорката Фуштиќ. Инаку во земјава со цистична фиброза се дијагностифицирани околу 130 пациенти.
