Прилеп во знакот на Свети Никола: 20 години градска слава со познатите „гинисови“ сармички и посна трпеза
Со благослови за радост, здравје и бериќет, Прилеп денеска традиционално го одбележа својот патрон празник – Свети Никола. Центарот на градот беше претворен во голема посна трпеза каде што граѓаните го прославија светецот-заштитник по 20-ти, јубилеен пат.
За прилепчани, еден од најзначајните моменти на овогодинешната прослава беше враќањето на традицијата на виткање мали посни сарми – гастрономскиот симбол со кој градот во 2008 година се запиша во Гинисовата книга на рекорди.
Централниот настан се одржа пред Параклисот во центарот на градот, каде што се освети и пресече славскиот колач. Градоначалникот Дејан Проданоски истакна дека дводецениската традиција е обврска за чување на вистинските вредности.
Тој додаде дека целта е Прилеп да се гради како препознатлива и отворена дестинација каде секој гостин ќе ја почувствува убавината на вековната историја.
Со утринската свечена литургија и верскиот обред чиноначалствуваше Владиката Петар. Тој потсети на суштината на празникот и на ликот на Свети Николај.
Традицијата продолжува и во иднина. На денешната прослава, во духот на обичаите, беше избран и новиот домаќин (кум) кој ќе ја организира градската слава во 2026 година.
